武汉虹口区海伦路有一条石库门弄堂叫瑞康里，老报人赵超构先生原先居住辣迭条石库门弄堂里。巧是巧得来，我跟伊是隔壁邻舍。邻舍道里个大人喊伊“赵先生”，阿拉小鬼头喊伊“赵家伯伯”。
印象顶深个是热天介。一到夜快头辰光，夜饭吃好个赵家伯伯欢喜辣屋里向个后门口放一只方凳子，上头放只茶杯搭一包香烟，跟隔壁邻舍一样，着辣汗背心或者赤膊，辣小竹椅浪吃茶抽烟乘风凉。搿个辰光，总归有隔壁几个大人跟伊讲得闹猛得来。现在想起来，大概侪是讲社会浪向发生个新闻搭好白相个事体，要末就是伊辣辣《新民晚报》高头发表“未晚谈”浪个豆腐干文章。
阿拉小辰光呒没电脑呒没电视机也呒没游戏机，搿个辰光阿拉小鬼头顶欢喜白相飞“香烟壳子”游戏。乃末赵家伯伯跟隔壁邻舍乘风凉茄山河个辰光，伊拉摆辣方凳子浪向个香烟就成了阿拉第一目标。迭个辰光白相香烟壳子是有名堂经个，按照香烟个等级分为好几个分数级。一般大人吃个是“劳动”（20分）“飞马”（30分），条件好点是“大前门”（50分），像赵家伯伯吃个是红牡丹、蓝牡丹当然是分外抢手。毕竟有100分和150分的身价哩，迭个是要翻劳动、飞马和大前门好几只“跟斗”辣海。阿拉当然是巴勿得伊拉早点吃好香烟，拿烟壳子送拨阿拉。趟趟是迭能个，当阿拉眼睛急吼吼地盯牢伊拉辰光，伊拉肚皮里清爽，小鬼头勿是欢喜听伊拉讲闲话，而是眼乌子铆牢方凳子浪向个香烟壳子。趟趟是迭能个，伊拉总归笑拉头摇摇，赵家伯伯第一个拿香烟从壳子里抽出来，其他几个大人也笑嘻嘻个拿香烟壳子里香烟倒出来，放辣方凳子高头。迭辰光就要看啥人手脚快运道好了。每趟阿拉楼底下客堂间个“长脚”总归出外快，赵家伯伯个红牡丹香烟壳子总归拨伊拿脱，阿拉只好搜眼劳动牌、飞马牌搭仔大前门香烟壳子。只好自己安慰自己，啥人叫侬手生得介短个啦，啥人叫侬运道介推扳个啦。
搿辰光，阿拉小手将烟壳子一一搜清爽，嘴巴里哼着“新民晚报，夜饭吃饱”个儿歌辣辣弄堂口开始阿拉飞香烟壳子个游戏。辣我小辰光个记忆里，白相香烟壳子好像比四国大战搭捉强盗来得更加刺激更加扎劲，每天夜头白相得汗汤汤渧。啥个天热啦啥个蚊子咬啦，统统侪忘记脱啦！现在想起来，真个老有劲个。